((هــــــبـــــــــالــــــي عــالــم مــن اختـــيـــاري)) تعــــال واتحداك ماتضحـــك

خاب من تحداني الإثنين مارس 26, 2012 9:14 am

هــــــــلاواللـــــــــــه
كيفكم انشاءالله تــــمــــــام ؟!!
المـــــوهم اليوم جايبتلكم رواية خطيــــــــــــرة
اقروهــــــــا و وروني ردودكم ok
{{ البارد الاول }}

أنا: هييه رفييق تعاال هنا
الهندي: إس فيهـ ؟!
أنا: وين هذا بيض مراعي ؟!
الهندي: ها إنتا إس فيه كلام ؟!
أنا: ضحكت بليا ضروس روح جيب طبق بيض و لبن المراعي بعدين يعطي هذا رجال ( وأأشر على أبوي اللي كان مع أخواتي يشتروا )
الهندي:أن ساء الله

((طاحت عيني على مجلات بآخر البقالة.. مشيت لها .. أخذت مجموعة مجلات بإيدي ومن غير قصد طاحت من إيدي على الأرض .. نزلت على الأرض أجمعها))

((في نفس الوقت كان ابوي يحاسب .. ثم طالع البقالة بتفقد إذا بقا أحد مننا بالبقالة))

((وركب في السيارة))

((أنا كنت أجمع المجلات اللي بالأرض و شدني موضوع بالحيييل ... ما أدري إلا أجلس متربعة لا إراديا ، واكمل قراءة....))

((في السيارة))ابوي: هاه كلكم ركبتوا؟!
شروق بلا اهتمام : ايه يبه حرك ((وكانت قدام بجمب أبوي))
((وجاء لابوي اتصال ...وانشغل بالاتصال))

((في البقالة))

...:يــــالله صلاة صلاة
((انا رفعت راسي وكأني نسيت اني ببقالة ، واشوف الرجال يحاسبوا بسرعة واللي يطلع..،أدور خواتي أبوي،
مالقيت أحد !!))

((طلعت براا البقالة))

أنا بنفسي "يمكن يستنوني براا في السيارة" <~~~ على نياتي

إلا اشوف فورد سوداء مظللة كان امشي لها بعجل (وافتح الباب)

أنا: معليش يبا تأخرت عليك ((واسكر الباب))

والتفت الا اشوف ذاك الوجه اللي يسد النفس .. وانا بعدم تصديق التفت للمرتبة اللي ورا ما لقيت خواتي ..
أكتشفت اني راكبة السيارة الخطأ ..!!

((وانزل بسرعة))
وانا خلاص ميتة من الخوف خانقتني العبرة فيني الصيحة لأول مرة بحياتي أحس بالضياع ، وأجلس على الأرض من الخوف ماني قادرة اوقف على رجولي ، واتسند على جدار البقالة ، وضامة رجولي "مصيرهم بيفقدوني وبيلقوني هنا إن شاء الله"

((بعد فترة قصيرة من الوقت))

بدأ يمتلي الشارع بالرجاجيل لأن انتهى وقت صلاة المغرب وانا ما زلت على وضعيتي..إلا واناظر رجول قدامي
أرفع راسي الا ذاك الرجال .. من الخوف نقزت واقفة وقلت لا اراديا : خـــيــــر؟!!!
وأطالع بايده بوك كان مطلع منه فلوس يحسب اني شحاذه أنا بنفسي :"جعلك العمى في عينك اليمين واليسار بعد مو وقتك" هو عطاني نظرة ودخل لبقالة.
وانا جلست ادعي ربي ارجع البيت سالمة.

رفعت راسي اشوف سيارة فيها حرمتين .. توكلت على الله ثم رحت لهم ..دقيت الشباك
..: الله يعطينا ويعطيك يا خالة
أنا:لالا أنـ ــا مو شحاذة واللي يعافيك يا خالة ساعديني
(واقولها القصة)
..:طيب خلاص اركبي وبأقول لولدي نوصلك للبيت
أنا: المشكلة ما أعرف وصف بيتنا
..: طيب تعرفين رقم أحد من أهلك ؟!
أنا: لا ماني حافظة وكل ارقام العايلة مخزنة عندي بالجوال بس فاضي الشحن وانا ما قصرت كثر ما ادق ، اللي مشغول واللي ما يرد
البنت اللي ورا: خلاص يمه ناخذها معنا لبيتنا تشحن جوالها وتكلم أهلها
الام: ونعم الرأي
أنا: بس ..
الام: لا بس ولا شيء يالله اركبي السيارة هذا فيصل جاء

((ركبت ورى ام فيصل بجانب بنتها))

(ويركب فيصل) السلام عليكم
الكل: وعليكم السلام والرحمة
أم فيصل: يا ولدي وصلنا للبيت
فيصل باستغراب: ليه ما تبون المول؟؟!
ام فيصل: لا ياولدي هنا معنا بنت مضيعة اهلها بالبقالة ونسوها وبنكلم اهلها وناخذ وصف بيتهم بس جوالها ما فيه شحن وبنروح البيت تشحن جوالها وتكلم اهلها
فيصل: اها ابشري يمه

((بعد دقائق من الصمت))

البنت: انا اسمي نورة وانتي؟؟
أنا "هذا وقته" : اسمي نوف
نورة:عاشت الاسامي
انا: عاشت ايامك

((وطول الطريق ساكتين...وصلنا بيت ام فيصل))

وانزل وانا خلاص الدنيا مسودة بوجهي وادخل البيت معهم دخلوني للمجلس .. فصخت نقابي وعبايتي..إلا نورة داخله: هذا الشاحن يدخل بجوالك ولا اجيب غيره؟؟
أنا: ((اشبكه بالكهرب)) لالا خلاص.....((جاري الشحن))

وما قصروا كل شيء قدموه لي بس نفسي عايفة الاكل وكل شيء..
وافتح الجوال إلا القا المكالمات والرسايل مالية الجوال
واطلع رقم ابوي: هذا رقم ابوي عطيه أخوك فيصل يا خذ منه الوصف
نورة : يالله عطيني
انا: لا لحظة باكلمه قبل اطمنه واقوله القصه ومنها اختصرها على فيصل
نورة:اوك
.......جاري الاتصال
((انا كلمت ابوي وقلت له السالفة من طقطق لــسلام))

((ووسكرت ))

أنا: نورة خلاص عطي الجوال لفيصل
نورة: طيب

في الصالة عند فيصل
نورة: فيصل خذ جوال نوف كلم ابوها خذ منه الوصف
فيصل: طيب
نورة : بس هي قالت له عن كل شيء الا الوصف
فيصل: طيب خلاص يا قلق
نورة: مالت عليك اجلس عندها ابرك
فيصل: يكون احسن

((جاري الاتصال))

فيصل: السلام عليكم
ابوي: وعليكم السلام والرحمة
فيصل:أخبارك؟؟
ابوي: بخير وانت وشلونك؟؟
فيصل : بخير دامك بخير.. بس بغيت وصف بيتكم أوصلها لك
ابوي: لا انا باجيكم .. بس وين بيتكم فيه؟؟
فيصل ووصف له..
ابوي: هههههههههه انتم الجيران الجديدين
فيصل باستغراب: ايواا قبل امس نزلنا
ابوي : خلاص انا جايكم وبيتنا تراا قبال بيتكم
فيصل: هههههههههه بس غريبه ما لاحظت بنتك البيت
ابوي: خلاص انا جاي الحين مو بعيد خليها تستعد
فيصل: ان شاء الله
ابوي: مشكور وما قصرت
فيصل :العفو
ابوي: مع السلامة
فيصل: في حفظ الرحمن

((وسكر))

أم فيصل : هاه بشر عرفتوا البيت وايش فيك تضحك؟؟
فيصل: صارت نوف بنت الجيران اللي قبال بيتنا بس كيف ما لاحظت بيتهم
ام فيصل : ما تنلام مسيكينه
فيصل : خلاص يمه قولي لها تجهز ابوها شوي وجاي وانا بروح ابدل ملابسي
ام فيصل: طيب
فيصل: هذا جوالها عطيها اياه
ام فيصل: ابشر

فيصل: تشااو
ام فيصل: ايييييش ميااو؟؟
فيصل : هههههههههه لا أبد سلامتك يا الغالية
ام فيصل: الله يسلمك

((وتم استلام ابوي البضاعة الغثيثة اللي هي انا ))

في الشارع:
فيصل : تفضل يا خالي ادخل
ابوي: تسلم لوقت ثاني ولا تنسى بكراا عشاكم عندنا
فيصل: يكون خير بس ابلغ الوالد
ابوي: سلم لي عليه ويالله مع السلامة
فيصل: في حفظ الله

((انا وابوي نمشي بالشارع "رجلية" لان البيت قبالهم))

أبوي:هههههههههههه انتي كل هذا حول معقولة ما شفتي البيت؟!!!
انا: ومعقولة تنسى بنتك ببقالة!! حرام عليك !!
أبوي: يا حبيبتي .. يوم كنا بالسيارة سالت قلت لكم ركبتوا؟؟قالت شروق ايوا والا يجيني ذاك الاتصال واكمل مكالمة وانشغلت ..! معليش حقك علي!!
أنا : اهم شيء رجعت لكم

((وندخل البيت))

استقبال امي وشروق و رهف

ابوي: يالله انا ماشي
رهف: وين بابا؟؟
ابوي: باجيب أحلا كيكة لاحلى بنوتة بمناسبة العودة
شروق بغيرة: ترا كلها ساعتين اللي فارقتنا
انا: هههههههههه احسن موتي حرة يبه لا تنسا العصير وورق العنب والكبة
شروق : ووش خليتي صدق طرار ويتشرط
انا: اف تششب ما لك خص!!
ابوي: اقول انا طالع تامرون بشيء ثاني اجيبه؟؟
الكل : سلامتك

((رحت اخذ لي شاور وابدل ملابسي..وانزل تحت))

دخل ابوي ومعاه اكياس وكراتين الكيك والعصير وورق العنب والكبة
انا: هلاااا بالحامل والمحمول
شروق : ههههههههههه اجل نويف ضيعي كل يوم
انا: نويف بعينك !! والضياع لعدويني ان شاءالله
رهف: لا يكون انا عدوتك وانا ما ادري
انا:لا انتي براس القائمة بعد شروقوه
شروق: اقول اووص اذا حظر الطعام بطل الكلام
انا:هههههههههههههههع هذا همك بطنك يا مال السم

((وكملنا بلع ))

من بكرة المدرسة- الفسحة:

جود: اووف وش هالزحمة ولا سوق غنم <~~ صديقتي الروح بالروح
انا: هههههههع حلوة
جود: الله يحلي ايامك
انا: اقول تششب من متى هالذرابة
جود: من انولدت وانا خلوقة
انا : ايه هين لا يكثر امممممم تحديني ابعد هالزحمة كلها؟!!
جود:ورينا ووش ورانا؟؟
انا : بس بشرط
جود: انتي وخري هالزحمة ويصير خير، لك اللي تبين ولك عيوني المركبه
انا: لا خلي عيونك لك وعيوني لي وشدعوا حولااء انا
جود: اقول تشب وجهك مو وجه دلع ويالله وخري هالبنات بسرعة
انا بخبث وصراخ: صـــــــــــــــــــــــــــــ اااااااااااااااااااا ارور

((هجووا كل البنات ما ينشاف منهم الا غبارهم))

انا: هاه وش رايك فيني؟؟!!
جود: سبحان الله ولا فقش مسيلمة بن كذا ب
انا: تششب خليني اشتري ما اصدق فضا لنا
انا: لو سمحتي
العامله: عاوزه إيه؟؟
انا بعبط : عندكم لبن ؟؟
العامله: لاءهـ
انا: طيب عندكم كليجا؟؟
العامله: انتي عندك كم سنة؟؟
انا: ثالث متوسط ليه السوعال؟؟
العامله:عاوزه اعرف مستوى تفكيرك!!
انا: طيب اخلصي 2 كتكات و2 عصير لي وللحبيبة اللي جمبي ((اقصد جود))
جود: وااي من متا هالكرم؟؟
انا : ((اخذ طلبي))
العامله: والحساب؟؟
انا:الحساب عليها
جود: وانا اقول وجهك مو وجه خير اعوذ بالله
العامله بعصبية:اديني بسرعة
جود: هااك خذي
((قمنا نتمشا))
جود: ومرض كلذا عجزانة تدفعين كم ريال
انا: مالي دخل هذا طلبي كفاية اكلتك بدري مع ذا الخشه
جود: اووف امري لله

وكني لمحت نورة
انا: جود انثبري هنا باسلم على وحدة وراجعه
جود: طيب
....
انا: اهلييييييييييييين وسهلييييييييييين توا ما ظلمت المدرسة
نورة: بوجودك هههههههههع
شروق: اووف حتا هنا ملاحقتني ..!
انا : خير جاية عشان وجهك
نورة: خير وش فيكم؟؟
انا: ايه شروقوه هذي نورة اللي امس بنت جيراننا اللي كلمتك عنها.. ونورة هذي اختي شروقوه للاسف
شروق: اقول تشب طقاقنا بالبيت
انا : يصير خير
نورة : توني ادري انكم خوات
شروق: وانا بعد توني ادري انك بنت جيراننا
انا: المهم ايش رايك بالمدرسة؟؟
نورة : من اسمها مدرسة ما عليها
انا: دووم
شروق : هيه يالهيسة أي دووم
انا: اقول انتي تششب .. الا تعالي انتي تروحين باص ولا سيارة ولا رجلية
نورة: لا سيارة مع اخوي فيصل
انا: اها ليش ما ترجعين معنا اليوم رجلية؟؟
نورة: لا صعبة ما قلت لاهلي
شروق : اقول مو صاير شيء واذا سالوا قولي رايحة مع شروق ونويف ومو قايلين شيء!!
نورة: ما ادري
انا: بناات ايش رايكم ننحاش
شروق : من كبر المدرسة؟!
انا: لا يا تنحة نهج من المدرسة بكبرها
نورة & شروق: شلوون؟؟
انا: نطلع من المدرسة بعد الحصة السادسة من غير احد يدري و نروح لمحل كون زون نشتري لنا آآيس كريم ونرجع لبيوتنا ما كنا مصلحين شيء ..هاه وش رايكم؟؟

شروق : ما دام السالفة فيها اكل مواافقة
انا: وانتي نورة؟؟
نورة : والله مدري
شروق: انتي كل شيء ما ادري مو صاير لنا شيء واذا جات الساعة 12 وربع رجعنا لبيتونا كالعاده
نورة: اممممممم خلاص اوكي
انا: هيــــــــــــــا خلاص الوعد بعد الحصة السادسة عند البوابة ضفوا عفشكم وهناك على طول بسرعة طيب
نورة & شروق: اووك

((بعد الحصة السادسة))

أنا: اوف هالبقر ليش ما جوا؟؟!
نورة : منوو البقر؟؟
انا: سكنهم مساكنهم ...
نورة:هههههههههههههه
انا: في غيركم انتي وشروقوه الا وينها ما جات
نورة: تضف عفشها وبتلحقنا واحسن بعد عشان ما احد يشك فينا

((بعد3 دقايق))

شروق تلهث من التعب: اللــ ــه يا خــ ذها من مراقبة يالله قدرت انحاش
انا: يالله بنات بسرعة ما في وقت البسوا عبايتكم وتغطوا زين لو انكشفنا لا سمح الله ما حد يعرفنا

((وطلعنا من المدرسة))

نورة: بنات تصدقون من زماان ما رحت مشوار رجلية
شروق: اجل خلاص تعودي
انا: خلونا بالمهم وين المحل فيه؟؟
شروق: على الشارع
انا : قولي قصم وش الجديد مع ذا الخشه؟؟!!
نورة: انا ما اقدر افيدكم بشيء توني جديدة على الحارة والحي باكمله
انا: خلاص مالكم الا انا اهم شيء نطلع على الشارع وندور
شروق: اقول لايكبر راسك علينا الحين اخلصي وين المحل فيه اكلنا الحر!! وظهري انكسر من الشنطة !!
انا: كلي تبن خليني افكر
شروق: الحين ما حفظتي وصف بيتنا تعرفين توصفين محل !!
نورة: عزاا الله اللي ضعنا !!
انا: اقول تشب انتي وياها والحقوني وانتم منطمين !!

((ونفرفر من شارع لشارع الين لقينا المحل))

شروق: واخيرا لقيناه
((وندخل))
وكل وحدة طلبت نكهة
شروق: رفيق انا يبي شوكليت
انا : توفي
نورة: فانيليا بالأوريو
((بقا الحساب.... وهنا المصيبة))
نورة: بنات دفعنا الفلوس بس باقي 6 ريالات
شروق: من وين ندبر انا شريت بفلوسي كلها على الفسحة
انا: جعلكم الفقر وهذا الشيء اللي ما حسبت حسابه
نورة: طيب وش بنسوي فلوسنا على قدنا
شروق: بنردح ووش بنسوي ..هاه يأم الحلول عطينا حل
انا: انتم اسكتوا طيب خلوني افكر
نورة: يا فرحة ما تمت
الهندي: يالله جيب فلوس
شروق: طيب لحظة جعلك السكني
انا: بنات ذكرت
شروق & نورة : ووشوو؟؟!
انا: فسحتي اليوم ما شريت فيها
((واعطي الهندي حسابه ونطلع من المحل))

((ونكمل طريقنا للبيوتنا..واحنا نلحس بهالأيس كريم ......))
نورة: الحمدلله خلصت
انا: وانا بعد خلصت
شروق: لحظة توني بقالي شوي
انا: حشاا كلب على هالتلحيس كأن أول مرة تذوقينه
شروق: حرام عليك الحر ما يرحم .. بنات شرايكم نرجع للمحل مرة ثانية
انا: معاك فلوس؟؟
شروق: لا
انا : أجل كلي تراب واسكتي
شروق : هييه حدك عاد
نورة: اووص فشلتونا تطاقوا اذا وصلتوا مو قدام الله وخلقه
شروق: اول مرا نورة تقول كلام زي الناس
نورة: خير طايحة من عينك انا ؟؟!!
انا: اقول اووص انتي وياها .. الا بنات احنا وينا فيه؟؟
شروق بلا اهتمام: شيء طبيعي بالرياض
انا : قولي قصم لو قلت لك انا ضعنا ووش بتسوين ؟؟
شروق: باصيح
نورة: اجل صيحي من الحين ضيعنا الطريق
شروق: ووش السواة ..هاه يا ام الحلول
انا: خييييييييير كل شيء على راسي انا ؟!
نورة: مو انتي اكبرنا؟؟!
انا: واذا صرت الكبيرة هذانا ضيعنا الحارة والطريق وكل شيء ضعنااا
نورة: لا ما ابي اضيع مثلك امس
شروق بصياح: اهئ اهئ ضااع مستقبلي
انا: اصلا انتي عندك مستقبل بالأوول؟؟!
شروق: تششب يا محطمة الآمال والطموحات
انا: ليش ان شاء الله اذا كبرتي ووش بتصيرين؟؟
شروق: دكتورة
انا:ههههههههههع اقول انتي وين والطب وين
شروق: ليش وش ناقصني؟!
انا: انتي حدك دكتورة بيطرية حقت حيوانات
شروق: وانتي اول من بأعالجهـ
انا: تخسين
نورة بصراخ: خلااااااااااااااااااااص
((كل الهنوود واللي يمشون بالشارع التفتوا لنا))
انا واقرص نورة باقواا ما عندي : يا بقرة شسويتي انتي شوفي العالم كلها تطالعنا
نورة: آآآآآآآآآآآآآآي ووجع ...اووف خلاص وش تبين اكثر ضياع وضعنا ووش بعد
شروق: نوف تكفين فكري وشلون نطلع من هالمأزق
انا: امممممممم نركب تاكسي
نورة: بس ما احد فينا يعرف يوصف البيت
شروق: ولا معانا فلوس
انا: يالله لو داريه جبت بوكي كله اليوم ابوو الحظ النحس
نورة: طيب وش نسوي الحين
انا: اجلسوا على الرصيف لاني تعبت من هالشنطة وهالحر والتفكير
نورة: وانا بعد
شروق: بنات
انا & نورة : خييير
شرووق : امممم ابي الحمام
انا بعصبية: ايييييش هذا وقته ؟!!!
نورة: نفتك من مصيبة نرجع لمصيبة ثانية
شروق : طيب ابي الحمام
انا: خلااص طيب .. شوفوا اصلا قعدتنا كذا غلط والحين الساعة 12 يعني بقا ربع ساعة ويطلعون الطلاب والطالبات من مدارسهم قدامنا ربع ساعة بس ووقعدتنا ما راح تفيدنا
نورة: ووش نسوي اجل؟
انا: نقوم نسال أي احد اذا صادفناه بطريقنا
شروق: يالله بسرعة طيب ما اقدر اتحمل
انا: اووف
نورة: اهم شيء نبي نوصل للبيت بسرعة قبل ما يكتشفون غيابنا

# ترى فيهـ تكميلهـ #

**حلالولي خقق** الثلاثاء مارس 27, 2012 7:11 pm

((هــــــبـــــــــالــــــي عــالــم مــن اختـــيـــاري)) تعــــال واتحداك ماتضحـــك

((هــــــبـــــــــالــــــي عــالــم مــن اختـــيـــاري)) تعــــال واتحداك ماتضحـــك

رد: ((هــــــبـــــــــالــــــي عــالــم مــن اختـــيـــاري)) تعــــال واتحداك ماتضحـــك